A Reserva de Biosfera Mariñas Coruñesas é unha figura territorial dependente da UNESCO e entre os seus obxectivos principais está a conservación da natureza, harmonizándoa co desenvolvemento socioeconómico do territorio dun xeito sostible.
A UNESCO, desde o seu programa “Home e Biosfera” (Man and the Biosphere), entende ao ser humano como parte integrante da natureza e axente clave do territorio para a súa conservación e desenvolvemento sostible, a diferenza doutras figuras de conservación.
Desde a Reserva desenvolvemos proxectos que buscan a conservación da biodiversidade, a restauración de hábitats ou a mellora da calidade da auga e dos solos mediante cultivos e prácticas máis sostibles, entre moitas outras temáticas, tanto desde iniciativas locais como europeas, coa colaboración das comunidades locais e das institucións do territorio, e sempre aliñados cos Obxectivos de Desenvolvemento Sostible e coa Axenda 20-30.
