Eva Rodríguez atópase dende o ano 2000 á fronte dunha explotación familiar de vacún de leite, en funcionamento dende os anos 70 e que vai xa pola súa 3ª xeración.
Emprazada na parroquia de Dordaño (concello de Oza-Cesuras) conta con certificación ecolóxica dende decembro de 2017.
Na actualidade dispón de 42 cabezas (60% en lactación) e unha produción anual entorno aos 120.000 kg de leite, cuxa comercialización canaliza cara a industria láctea de leite ecolóxico UHT.
A alimentación dos animais baséase no pastoreo, apoiándose cando a climatoloxía é máis adversa en ensilado de herba e pequenas porcentaxes de concentrados de cereais ecolóxicos.
Cunha base territorial de 45 hectáreas (60% propias e 40% arrendadas ou cedidas) ten como obxectivo unha produción ecolóxica de leite que ademais sexa sostible ao recorrer o menos posible a insumos externos. Boa parte da superficie actual de pastoreo obtívose coa reconversión de terreos anteriormente dedicados á produción forestal de especies de crecemento rápido.
O obxectivo marcado é o de tentar medrar ata o máximo permitido pola regulamentación ecolóxica (2 UGM/ha), sempre dende a óptica da sostibilidade e a defensa dunha actividade agraria digna no seu contorno.
Eva traballa co apoio dunha persoa asalariada e a colaboración puntual de alumnado en prácticas de centros de formación agraria.
.jpeg)
.jpeg)
